Joriy yilning 1-iyun kuni Korrupsiyaga qarshi kurashish agentligi direktori hamda Jahon banki eksperti Laura Pop oʻrtasida uchrashuv boʻlib oʻtdi. 

Maʼlumot uchun: Laura Pop Jahon banki guruhida moliyaviy barqarorlik va yaxlitlik boʻyicha moliyaviy sektorning katta mutaxassisi va Oʻgʻirlangan aktivlarni qayta tiklash (StAR) jamoasi aʼzosi boʻlib, mazkur yoʻnalishda Agentlik xodimlariga ekspertlik koʻmagi koʻrsatib kelmoqda. 

Uchrashuv avvalida A.Burxanov mamlakatimizda korrupsiyaga qarshi kurashish sohasida islohotlar jarayoni, qonunchilikdagi yangilik va oʻzgarishlar, xususan, davlat xizmatchilarining mol-mulki va daromadlarini deklaratsiyalash tizimini joriy etish boʻyicha bugungi kunda olib borilayotgan ishlar xususida maʼlumot berib oʻtdi. 

Jumladan, kuni-kecha Oliy Majlis Senatining navbatdagi yalpi majlisida  senatorlar tomonidan maʼqullangan “Davlat fuqarolik xizmati toʻgʻrisida”gi Oʻzbekiston Respublikasi Qonunida davlat fuqarolik xizmatchisi qonunda belgilangan muddatlarda va tartibda oʻz daromadlari hamda mol-mulki toʻgʻrisida deklaratsiyani taqdim etishi shartligi qatʼiy belgilab qoʻyilganiga alohida urgʻu berildi. 

Shundan soʻng ikki tomon vakillari mol-mulk va daromadlarni deklaratsiya qilishning oʻziga xos mezonlari, jumladan, deklaratsiyaga kiritilishi lozim boʻlgan asosiy maʼlumotlar, deklaratsiya shakli, uni toʻldirish, topshirish va tekshirish tartibi toʻgʻrisidagi qoidalarni ishlab chiqish kabi masalalarni muhokama qildilar.

Muloqotlar chogʻida deklaratsiya topshirish jarayonini raqamlashtirish, taqdim etilgan maʼlumotlarni tekshiruvdan oʻtkazishning elektron tizimini yaratish va boshqarish jarayonlari xususida ham oʻzaro fikr almashildi. 

Shuningdek, deklaratsiya tizimini amaliyotga muvaffaqiyatli tatbiq etishda xalqaro tajriba, ekspertlarning taklif va tavsiyalari muhim ahamiyat kasb etishi, bu borada ayniqsa, tahliliy tadqiqotlar va boshqa uslubiy koʻmakka ehtiyoj borligi taʼkidlab oʻtildi. 

Uchrashuv yakunida korrupsiyaga qarshi kurashishning turli yoʻnalishlari, jumladan, davlat xizmatchilari mol-mulki va daromadlarini deklaratsiyalash, manfaatlar toʻqnashuvi va korrupsiyaviy xavf-xatarlarni aniqlash yoʻnalishlarida oʻzaro hamkorlik aloqalarini davom ettirishga kelishib olindi. Ekspert L.Pop Jahon banki mazkur yoʻnalishda ekspertlik va texnik koʻmak koʻrsatishga tayyor ekanligini bildirdi.

Korrupsiyaga qarshi kurashish agentligi 
Axborot xizmati