Joriy yilning 6-iyun kuni Buyuk Britaniyaning Oʻzbekistondagi elchixonasi tomonidan Korrupsiyaga qarshi kurashish agentligi koʻmagida tashkil etilgan "Yuqori darajadagi mansabdor shaxslarda halollik standartlarini shakllantirish" mavzusida oʻquv kurslari boshlandi. 

4 kun davom etadigan mazkur oʻquv kurslariga Buyuk Britaniyaning turli sohalardagi ekspertlari  jalb etilgan boʻlib, unda Korrupsiyaga qarshi kurashish agentligi, Bosh prokuratura, Adliya, Ichki ishlar, Mudofaa,  Iqtisodiy taraqqiyot va kambagʻallikni qisqartirish vazirlliklari hamda Milliy gvardiyaning 30 nafarga yaqin vakillari ishtirok etmoqda. 

Ishtirokchilar safida qoʻshni mamlakatlar (Qozogʻiston, Qirgʻiziston va Tojikiston Respublikalari) vakillari ham bor.

Oʻquv kurslari davomida Buyuk Britaniyada halollik standartlarining joriy etilishi, davlat xizmatida yetakchilik, moliyaviy boshqaruv va inson resurslaridan foydalanish, davlat xaridlarini tashkil etish, OAV va jamoatchilik bilan samarali ishlash mavzularida maʼlumotlar berilmoqda. 

Shuningdek,  ishtirokchilarni qiziqtirgan savollar yuzasidan amaliy muloqotlar tashkil etilmoqda.  

Tadbir yakunida barcha ishtirokchilarga tegishli sertifikatlar topshirilishi koʻzda tutilgan. 

Korrupsiyaga qarshi kurashish agentligi
Axborot xizmati