Buxoro viloyat Korrupsiyaga qarshi hududiy kengashining bugun boʻlib oʻtgan navbatdagi  yigʻilishida shu haqda soʻz bordi. 

Yigʻilishda, ayniqsa, viloyat maktabgacha taʼlim tizimidagi korrupsion holatlarga alohida eʼtibor qaratildi. 

Tahlillarga koʻra, viloyatda 2021-yilda maktabgacha taʼlim tizimida faoliyat yuritgan 13 nafar shaxsga nisbatan 10 ta jinoyat ishi sudga yuborilgan.Ular tomonidan oʻzlashtirish yoki rastrata yoʻli bilan talon-toroj qilish hamda pora olish kabi jinoyatlar sodir qilingan.

Yigʻilishda bu kabi salbiy holatlar korrupsiyaga qarshi kurashish sohasidagi islohotlar samarasi va xalq ishonchiga putur yetkazayotgani qayd etildi. Ushbu jinoyatlarning kelib chiqish sabablari, ularning oldini olish uchun koʻriladigan choralar toʻgʻrisida esa viloyat prokurori, maktabgacha taʼlim boshqarmasi boshligʻi axborot berdi.  

Muhokamalar davomida viloyat Korrupsiyaga qarshi hududiy kengashi faoliyatini yanada takomillashtirish masalasi ham koʻrib chiqildi. 

Yakunda ishtirokchilar tomonidan kelgusida viloyatda korrupsiyaning oldini olish ishlarini jadallashtirish yuzasidan maqsad va vazifalar belgilab olindi.

Korrupsiyaga qarshi kurashish agentligi

Axborot xizmati