Navoiy viloyati Korrupsiyaga qarshi kurashish hududiy kengashining joriy yil 8-iyun kuni boʻlib oʻtgan navbatdagi yigʻilishida viloyat gaz taʼminoti tizimida uchrayotgan korrupsion holatlar, shuningdek, tizimda korrupsiyaning oldini olish boʻyicha koʻrilayotgan choralar muhokama qilindi.  

Taʼkidlanishicha, viloyatda 2021-yilda "Hududgaztaʼminot" tizimida faoliyat yuritgan 11 nafar shaxsga nisbatan 7 ta jinoyat ishi sudga yuborilgan. Ular tomonidan oʻzlashtirish yoki rastrata yoʻli bilan talon-tоroj qilish hamda firibgarlik jinoyatlari sodir etilgan.

Yigʻilishda mavzu yuzasidan viloyat prokurori va boshqa masʼullarning axboroti tinglanib, bu kabi qonunbuzilish holatlarining kelib chiqish sabablari va ularni bartaraf etish choralari  xususida fikr almashildi. 

Muhokamalar jarayonida Hududiy kengashning ish rejasida belgilangan vazifalar ijrosi ham koʻrib chiqildi.

Qayd etilganidek, 2022-yilning aprel oyida Navoiy viloyatida  22 ta korrupsiyaga oid jinoyatlar sodir etilganligi koʻrsatkichi bilan viloyat eng koʻp korrupsiyaviy jinoyatlar sodir etilgan 5 ta hududdan biri boʻlgan.

2022-yilning 1-choragida vakolatli organlar tomonidan viloyatning 72 ta nazorat obyektida oʻtkazilgan tekshiruvlarning 44 tasi yoki 61 foizida qonunbuzilish holatlari aniqlanib, 1 mlrd. 854 mln. soʻmlik byudjet mablagʻlarining noqonuniy sarflanishi bilan bogʻliq holatlar qayd etilgan.

Ishtirokchilar tomonidan kelgusida Hududiy kengash faoliyati samaradorligini yanada oshirishda eʼtibor qaratilishi va hal etilishi lozim boʻlgan jihatlarga ham  alohida urgʻu berildi. Xususan, Kengash oʻz faoliyatida monitoring va nazorat tadbirlarini  oʻtkazish, eshituvlar tashkil etish kabi instrumentlardan samarali foydalanishi lozimligi alohida taʼkidlandi. 

Bundan tashqari, nodavlat notijorat tashkilotlari, ommaviy axborot vositalari bilan oʻzaro hamkorlikni mustahkamlash orqali korrupsiyaga qarshi kurashish jarayoniga aholini keng jalb etish ishlarini yanada kuchaytirish zarurligi bildirildi. 

Eshituv yakunida Kengash aʼzolari masʼuliyatini oshirish boʻyicha aniq choralar koʻrish, shuningdek, gaz taʼminoti tizimini korrupsiyadan xoli qilish boʻyicha taklif va tavsiyalar ishlab chiqilib, asosiy vazifalar belgilab olindi.

Korrupsiyaga qarshi kurashish agentligi 
Axborot xizmati