Xabar berganimizdek, joriy yilning 6-9-iyun kunlari Jahon bankining «Korrupsiyaga qarshi kurashda institutsional salohiyatni kuchaytirish» loyihasi doirasidagi ekspertlar Missiyasi mamlakatimizda korrupsiyaga qarshi kurashish sohasiga aloqador vazirlik va idoralar bilan uchrashuvlar tashkil etmoqda.

Bugun, joriy yilning 9-iyun kuni Agentlik va Jahon banki vakillari oʻrtasida Missiyaning yakunlariga bagʻishlangan onlayn uchrashuv boʻlib oʻtdi.

Unda tomonlar oʻrtasida aloqalarni mustahkamlash va Oʻzbekistonda korrupsiyaga qarshi kurashish sohasidagi islohotlarni amalga oshirishda hamkorlikning aniq yoʻnalishlari yana bir bor muhokama etilib, kelgusidagi maqsad-vazifalar belgilab olindi.

Unga koʻra, Agentlik hamda Jahon banki vakillari davlat xaridlarida korrupsiyaviy xavf-xatarlarni aniqlash, davlat idoralarida korrupsiyaviy omillarni bartaraf etish metodologiyasini joriy etish, manfaatlar toʻqnashuvi, daromadlar va mol-mulkni deklaratsiyalash, shuningdek, Agentlik faoliyatini institutsional baholash yoʻnalishlarida hamkorlikda ish olib boradilar.

Uchrashuv yakunida oʻzaro hamkorlik doirasida maqsadli loyihalarni ishlab chiqishga va ekspertlik koʻmagini koʻrsatishni davom ettirishga kelishib olindi.

Korrupsiyaga qarshi kurashish agentligi
Axborot xizmati