Joriy yilning 11-iyun kuni Ichki ishlar vazirligi akademiyasida mamlakatimizda korrupsiyaga qarshi kurashish va uning oldini olish boʻyicha amalga oshirilayotgan islohotlar va ularning ahamiyatiga bagʻishlangan tadbir boʻlib oʻtdi. Unda Korrupsiyaga qarshi kurashish agentligi direktori A.Burxanov ishtirok etdi.  

Agentlik direktori davlatimiz rahbari tashabbusi bilan korrupsiyaga qarshi kurashishga safarbar etilayotgan zarur kuch va vositalar, jumladan, korrupsiyaga qarshi kurashish yoʻnalishida normativ-huquqiy asoslarni takomillashtirish, bu borada xalqaro standartlarni Oʻzbekiston qonunchiligiga implementatsiya qilish, xalqaro reytinglarda oʻrnimizni yaxshilash borasida olib borilayotgan keng koʻlamli ishlar va ularning samarasi xususida maʼlumot berib oʻtdi.

 
Tadbirda Agentlik tomonidan aholi va davlat xizmatchilarining korrupsiyaga qarshi kurashish sohasidagi bilimlarini uzluksiz oshirish tizimini joriy qilish borasida amalga oshirilayotgan ishlar xususida ham toʻxtalib oʻtilib, “Korrupsiyaga qarshi kurashish virtual akademiyasi” faoliyatini yoʻlga qoʻyish ustida ish olib borilayotgani qayd etib oʻtildi.  

Muloqotda, shuningdek, ichki ishlar organlari xodimlarining korrupsiyaga qarshi kurashish sohasidagi oʻrni va roliga toʻxtalib oʻtildi. Ayniqsa, Akademiya professor-oʻqituvchilari tomonidan kursantlarning “Halollik vaksinasi” doirasida aholi oʻrtasida jamiyatda huquqiy ongni, huquqiy madaniyatni yuksaltirish va qonuniylikni mustahkamlashga qaratilgan bilim hamda koʻnikmalarini oshirishga alohida eʼtibor qaratish zarurligi qayd etildi.

Tadbir soʻnggida mehnat faoliyatida alohida oʻrnak koʻrsatgan pedagog-xodimlar munosib ragʻbatlantirildi.

Korrupsiyaga qarshi kurashish agentligi

Axborot xizmati