Joriy yilning 23-iyun kuni Korrupsiyaga qarshi kurashish agentligida “Bikal” axborot texnologiyalari kompaniyasi Kuzatuv kengashi aʼzosi, Britaniya parlamenti Lordlar palatasi aʼzosi Aleksandr Karlayl bilan uchrashuv boʻlib oʻtdi.

Uchrashuvning asosiy maqsadi korrupsiyaga qarshi kurashishda zamonaviy axborot texnologiyalarini joriy etish boʻyicha oʻzaro tajriba almashish hamda ikki tomonlama hamkorlik masalalarini muhokama qilishdan iborat boʻldi.

Uchrashuvda dastlab Agentlik vakillari tomonidan mamlakatimizda korrupsiyaga qarshi kurashish davlat siyosatining asosiy yoʻnalishlari, xususan, Agentlik vakolatlari va vazifalari, amalga oshirilayotgan loyihalar va kelgusidagi rejalar haqida batafsil maʼlumot berdi.

Muhokamalar markazida Oʻzbekistonda davlat xizmatida halollikni kuchaytirish va manfaatlar toʻqnashuvining oldini olishda Britaniya tajribasini oʻrganish boʻyicha hamkorlik qilish istiqbollari boʻldi. 

Shuningdek, oʻzaro hamkorlikning dastlabki qadamlari sifatida korrupsiyaga qarshi kurashish sohasida tajriba almashish, Agentlik xodimlarining salohiyati va malakasini oshirishga qaratilgan oʻquv dasturlar, stajirovka hamda qoʻshma loyihalarni amalga oshirish bilan boshlashga kelishib olindi.

Uchrashuv yakunida ikki tomon oʻrtasida samarali hamkorlik yoʻlga qoʻyilishi mamlakatlarimiz uchun birday manfaatli ekanligi taʼkidlandi.

Korrupsiyaga qarshi kurashish agentligi
 Axborot xizmati