Oʻzbekiston Respublikasi Korrupsiyaga qarshi kurashish agentligi, Oʻzbekiston Respublikasining Germaniya Federativ Respublikasidagi diplomatik vakolatxonasi, Shveysariya Konfederatsiyasining Oʻzbekistondagi elchixonasi hamda Birlashgan Millatlar Tashkilotining Taraqqiyot dasturi hamkorligida Oʻzbekiston delegatsiyasining Shveysariyaga xizmat safari boshlandi.

Tashrifning maqsadi – korrupsiyaning oldini olish va samarali boshqaruvni joriy etish sohalarida tajriba almashish, ikki davlat vakolatli organlari oʻrtasida oʻzaro hamkorlik aloqalarini yoʻlga qoʻyish, shu jumladan aktivlarni qaytarish, sohaga oid xalqaro standartlarni implementatsiya qilish, samarali boshqaruv hamda korrupsiyaning oldini olish boʻyicha komplayens-nazorat tizimlari joriy etilishi yuzasidan hamkorlik qilishdan iborat.

Tashrifning ilk kuni delegatsiyaning Bazel boshqaruv instituti hamda Aktivlarni qaytarish xalqaro markazi rahbariyati va mutaxassislari bilan uchrashuvi tashkil etilib, muloqotlar davomida samarali boshqaruv va aktivlarni qaytarish, komplayens tizimini joriy etish boʻyicha faoliyati, kollektiv harakat (bilimlar markazi) va “Yashil korrupsiya” loyihalari bilan yaqindan tinishdilar.

Maʼlumot uchun: Bazel instituti 2003-yilda tashkil etilgan mustaqil tashkilot boʻlib, xorijiy davlatlar vva xalqaro darajada davlat va xususiy sektorlarda korrupsiyaning oldini olish hamda samarali boshqaruv boʻyicha tadqiqotlar oʻtkazish, amaliy mexanizmlarni joriy etish va loyihalarni amalga oshirish boʻyicha faoliyat yurituvchi tashkilot hisoblanadi.

Uchrashuv yakunida Agentlik va Bazel instituti oʻrtasida hamkorlik loyihalarini ishga tushirish, Oʻzbekistonda sohaga oid institutsional salohiyatni kuchaytirish boʻyicha hamkorlik qilish yuzasidan kelishuvga erishildi.

Xizmat safari davomida Oʻzbekiston delegatsiyasi Shveysariyaning Bosh prokuraturasi, Tashqi ishlar vazirligi Korrupsiyaga qarshi kurashish boʻyicha idoralararo ishchi guruhi, Federal audit idorasi, Transparency International Switzerland, Shveysariya rivojlanish va hamkorlik tashkiloti hamda boshqa davlat idoralari bilan ikki tomonlama uchrashuvlar oʻtkazadi.

Tashrif davomida tashkil etilgan tadbirlar yuzasidan batafsil maʼlumot alohida eʼlon qilib boriladi.

Korrupsiyaga qarshi kurashish agentligi

Axborot xizmati