Joriy yilning 26-iyul kuni Korrupsiya qarshi kurashish agentligi direktori  hamda Yaponiyaning Nagoya universiteti Prezidenti Naoshi Sugiyama hamda Tokay Milliy Oliy ta’lim va tadqiqot muassasalari tarmogʻi rahbari Seyichi Matsuo oʻrtasida uch tomonlama onlayn uchrashuv boʻlib oʻtdi. 

Yapon tomoni Oʻzbekistonning aksilkorrupsiya siyosatga oid islohotlari dolzarbligini e’tirof etib, Agentlik  bilan aloqalarni rivojlantirish, shuningdek, mazkur yoʻnalishda ta’lim va ilmiy tadqiqotlar boʻyicha  hamkorlikni chuqurlashtirish mamlakatlarimiz uchun birday manfaatli ekanligini bildirdi. 

Shundan soʻng muloqot Osiyo huquqiy hamkorlik markazi rahbariyati bilan davom etdi. Tomonlar korrupsiyaga qarshi kurashish sohasida xodimlarning malakasini oshirish, qoʻshma tadqiqot loyihalarini amalga oshirish, tajriba va ma’lumot almashinuvini yoʻlga qoʻyish xususida oʻzaro fikr almashishdi. 

Muloqot chogʻida Agentlik direktori A.Burxanov Yaponiya universitetlari ekspert va professorlarini jalb qilgan holda korrupsiyaga qarshi kurashish va davlat xizmatchilarining bu boradagi bilimlarini oshirish boʻyicha seminar va treninglar oʻtkazish, Yaponiyada qisqa muddatli oʻquv kurslarini tashkil etish orqali davlat xizmatchilarining malakasini oshirish kabi  yoʻnalishlarda hamkorlik oʻrnatishni taklif etdi.  

Markaz vakillari bu kabi muhim taklif va tashabbuslarni qoʻllab-quvvatlashga tayyor ekanligini ma’lum qildi. 

Yakunda aholi va davlat xizmatchilari uchun korrupsiyaga qarshi ta’lim jarayoni, korrupsiyaga qarshi kurashish boʻyicha dasturlarni yaratish va tadqiqotlar olib borishga oid  qoʻshma tadbirlarni amalga oshirish  boʻyicha hamkorlik qilishga  kelishib olindi.

Korrupsiyaga qarshi kurashish agentligi

Axborot xizmati