Xabar berganimizdek, joriy yilning 1-avgust kunidan e’tiboran Korrupsiyaga qarshi kurashish agentligi oliy ta’lim muassasalarining bakalavriat ta’lim yoʻnalishlariga kirish uchun ijodiy (kasbiy) imtihonlarning ochiq, shaffof tashkil etilishi va ularning Internet tarmogʻi orqali jonli efirga uzatilishi sifatini masofaviy monitoring qilishni boshladi. 

Mazkur jarayonda Agentlik vakillari Oliy va oʻrta maxsus ta’lim vazirligining Komplayens nazorat va korrupsiyaga qarshi kurashish boʻlimi mas’ul xodimlari ishtirokida imtihonlar oʻtkazilayotgan bino va maydonlarda ham oʻrganishlar olib bormoqda. 

Xususan, bugun Agentlik direktori Akmal Burxanov boshchiligidagi ishchi guruh Oʻzbekiston jurnalistika va ommaviy kommunikatsiyalar universitetida bakalavriat ta’lim yoʻnalishlari – kunduzgi, kechki va sirtqi ta’lim shakli boʻyicha 11 ta yoʻnalish doirasida kunning birinchi yarmida boʻlib oʻtgan ijodiy imtihonlar jarayonida bevosita ishtirok etdi.  

Vakillar  dastlab  suhbat va yozma (insho) shakldagi ijodiy imtihonlarning shaffofligini ta’minlash, talabalikka da’vogarlarning bilim darajasini xolis va adolatli baholash, sinov jarayonlarida korrupsion xavf-xatarlarning oldini olish maqsadida universitetda amalga oshirilgan tashkiliy ishlar bilan tanishdi. 

Ijodiy imtihonlar veb-kameralar oʻrnatilgan xonalarda hay’at a’zolari nazorati, ishchi guruh kuzatuvi ostida boshlandi. Jarayonlar barcha foydalanuvchilar uchun ochiq boʻlgan  imtihon.edu.uz veb-platformasi orqali onlayn translyatsiya qilib borildi. Shuningdek, ommaviy axborot vositalari vakillari, ota-onalarning ham ijodiy imtihonlarni real vaqt rejimida kuzatishga jalb etilgani baholash ishlarining shaffofligini ta’minlashda jamoatchilik nazoratini yanada kuchaytirdi.  

Eslatib oʻtamiz, Korrupsiyaga qarshi kurashish agentligi OTMlarda joriy yilning 10-avgust kuniga qadar boʻlib oʻtadigan ijodiy imtihonlarning ochiq va shaffof tashkil etilishi, jarayonlarning Internet tarmogʻi orqali jonli efirga uzatilishi sifatini doimiy monitoring qilib boradi. 

Ushbu jarayon tafsilotlari Agentlikning rasmiy sahifalari orqali muntazam yoritib boriladi.  

Alohida iqtidor talab etiladigan ta’lim yoʻnalishlari boʻyicha kasbiy (ijodiy) imtihonlar jarayonini jonli efirga uzatayotgan OTMlar  roʻyxati bilan quyida tanishish mumkin: 
 

Alohida iqtidor talab etiladigan ta’lim yo‘nalishlari bo‘yicha kasbiy (ijodiy) imtihonlar jarayonini jonli efirga uzatayotgan OTMlar
RO‘YXATI

Korrupsiyaga qarshi kurashish agentligi 
Axborot xizmati