Korrupsiyaga oid masalalarni ijtimoiy tarmoqlarda qanday yoritish kerak? Mazkur mavzuga doir axborot manbalari bilan ishlashda nimalarga e’tibor qaratish zarur? Bu borada jurnalist xavfsizligi-chi, qanday ta’minlanadi? 

“Korrupsiyaga qarshi kurash masalalarini yoritish boʻyicha jurnalist, bloger, NNT faollarining salohiyatini oshirish” mavzusidagi trening OAV va NNT vakillarigashu kabi savollar atrofida fikr almashish, tajriba va malaka oshirish imkonini bermoqda. 

Korrupsiyaga qarshi kurashish agentligi va Jurnalistlarni qayta tayyorlash markazi hamkorligida mamlakatimizning barcha hududlari boʻylab tashkil etib kelinayotgan mazkur trening 2-3-avgustlari Toshkent shahrida boʻlib oʻtdi. 

Treningda taniqli mediatrenerlar hamda Agentlik ma’sul xodimlari tomonidan OAV vakillariga korrupsiya va uning turlari, korrupsiyaga qarshi kurashda milliy va xalqaro qonunchilik asoslari,korrupsiyaga qarshi kurashishda muvaffaqiyatga erishgan davlatlar tajribasi boʻyicha ma’lumot berildi. 

Shuningdek, korrupsiyaga qarshi kurashishda ijtimoiy sheriklikning oʻrni, sohada targʻibot-tashviqot ishlarini toʻgʻri yoʻlga qoʻyish, qonunchilik hujjatlari bilan samarali ishlash, kasb etikasi va shaxs huquqlari chegarasini buzmaslik kabi dolzarb masalalar boʻyicha taqdimotlar ham oʻtkazildi. 

Korrupsiya bilan bogʻliq ishlarni yoritishning oʻziga xos jihatlari, ayni yoʻnalishda jurnalistik surishtiruv olib borishda faktlarni toʻgʻri tahlil va talqin qilish, ob’yektivlik va shafofflikni ta’minlash turli keyslar va amaliy mashgʻulotlar misolida koʻrib chiqildi. 

Ishtirokchilarga mass-media vositalari (videoroliklar, internet va boshqa OAV materiallari) yordamida fuqarolarni korrupsiyaga qarshi munosabatini shakllantirish hamda huquq-targʻibot idoralari bilan hamkorlikni samarali tashkil etish usullari yuzasidan ham zarur tavsiyalar berildi.  

Korrupsiyaga qarshi kurashish agentligi
Axborot xizmati