Joriy yilning 27-avgust kuni Korrupsiyaga qarshi kurashish agentligi huzuridagi jamoatchilik kengashining ta’sis yigʻilishi boʻlib oʻtdi. 

Yigʻilishda kengashning asosiy maqsad va vazifalari hamda boshqa tashkiliy masalalar muhokama qilindi.

Oʻzbekistonda korrupsiyaning oldini olish va unga qarshi kurashish boʻyicha olib borilayotgan siyosat va chora-tadbirlarning samaradorligini oshirishga koʻmaklashish Jamoatchilik kengashining asosiy maqsadi ekanligi qayd etildi.

Kengash a’zolari tomonidan ushbu maqsadni amalga oshirish uchun bir qator taklif va tavsiyalar bildirildi.

Xususan, Agentlik tomonidan ishlab chiqilayotgan normativ-huquqiy hujjatlar muhokamalarida ishtirok etish va takliflar bildirib borish, Korrupsiya eng koʻp uchrayotgan sohalardan biri yuzasidan jamoatchilik eshituvini tashkil etish, korrupsiyaviy xavflarni kamaytirish yuzasidan tahliliy materiallar va takliflarni agentlikka taqdim etib borish kabi yoʻnalishlar shular jumlasidandir.

Shuningdek, yigʻilishda tashkiliy masala ham koʻrib chiqildi va kengash raisi va uning oʻrinbosarlari saylandi.

Korrupsiyaga qarshi kurashish agentligi 
Axborot xizmati