Davlat organlari va idoralarining ochiqligini taʼminlanishini tashkil etish va ushbu jarayonni muntazam ravishda monitoring qilib borish Korrupsiyaga qarshi kurashish hududiy kengashlarining asosiy vazifalaridan biri hisoblanadi. Shu boisdan  Korrupsiyaga qarshi kurashish hududiy kengashlari uchun muntazam ravishda tashkil etilayotgan navbatdagi seminar mavzusi Davlat organlari va tashkilotlari faoliyatining ochiqligini monitoring qilish va baholash toʻgʻrisida boʻlib oʻtdi. 

Agentlik vakillari tomonidan tashkilotlar faoliyati ochiqligi, shaffofligi va hisobdorligini taʼminlash, jamoatchilik nazoratini kuchaytirish, ommaviy axborot vositalari samarali faoliyat yuritishlari uchun shart-sharoit yaratish, byurokratik toʻsiqlarni yanada qisqartirish va korrupsiya illatlariga barham berish maqsadida har yil yakunlari boʻyicha Davlat organlari va tashkilotlarining ochiqlik indeksini shakllantirish yoʻlga qoʻyilayotgani taʼkidlandi.

 Qayd etilganidek, Davlat organlari va tashkilotlari faoliyatining ochiqlik darajasi quyidagi  8 ta indikator asosida baholab boriladi:

- davlat organlari va tashkilotlarida ochiqlikni taʼminlashga masʼul boʻlgan xodimlar faoliyatining samaradorligi;

- davlat organlari va tashkilotlarining rasmiy veb-saytlarida axborotlarni joylashtirish va elektron davlat xizmatlari koʻrsatish holati;

- ijtimoiy ahamiyatga molik maʼlumotlarni qonunchilikda belgilangan axborot resurslarida eʼlon qilish va jamoatchilik oldida hisobdorlik tizimining yoʻlga qoʻyilishi;

- byudjet jarayonining ochiqligini taʼminlashga oid maʼlumotlarning rasmiy veb-saytda joylashtirilishi;

- Ochiq maʼlumotlar portalida maʼlumotlar joylashtirilishi;

- ommaviy kommunikatsiya texnologiyalarining joriy qilinishi;

- korrupsiya holatlarini barvaqt aniqlash va ularning oldini olishda ochiqlik tamoyillaridan foydalanish holati;

- jamoatchilik kengashi faoliyatining samaradorligi.

Seminar davomida hududiy kengashlarning ochiqlikni taʼminlash jarayonidagi ishtiroki va ular eʼtibor qaratish lozim boʻlgan masalalar haqida ham fikr almashildi.

Jumladan, ayrim tuman-shahar hokimliklarining rasmiy veb-sayti talab darajasida yuritilmayotgani, hududiy kengash tomonidan oʻrganish oʻtkazish, natijalari boʻyicha komissiya yigʻilishi yoki sessiyalarda eshituv amaliyotidan foydalanilmayotgani, yeki sessiyalarni telekanallar, shuningdek Internet tarmogʻi orqali jonli efirga uzatilishida jiddiy nuqsonlar mavjudligi qayd etildi.

Ushbu masalalarni bartaraf etish maqsadida hududlardagi tashkilotlarning ochiqligini, shaffofligini yuqoridagi indikatorlar asosida tahlil qilish va hududiy kengashlar yigʻilishlarida muntazam muhokama qilib borishi zarurligi bildirildi.

Shuningdek, respublika tashkilotlari tomonidan hududga oid maʼlumotlarning toʻgʻri va haqqoniy kiritilganini oʻrganish va monitoring qilib borish borasida ham hududiy kengashlar oldiga aniq vazifalar belgilandi. 

Korrupsiyaga qarshi kurashish agentligi

Axborot xizmati