Korrupsiyaga qarshi kurashish agentligi tomonidan Oliy Majlis huzuridagi jamoat fondi, “Ijtimoiy fikr” Respublika jamoatchilik fikrini oʻrganish Markazi va Jurnalistlarni qayta tayyorlash markazi bilan hamkorlikda “Korrupsiyaning oldini olishda fuqarolik jamiyati institutlarining ishtiroki” mavzusidagi loyihalar taqdimoti tashkil etildi.

Unda Agentlik masʼul xodimlari, mamlakatimizda faoliyat yuritayotgan 40 dan ortiq NNTlar va ommaviy axborot vositalari vakillari ishtirok etishdi.

Tadbirda 2021-yilda Korrupsiyaga qarshi kurashish agentligi buyurtmasiga asosan, Oliy Majlis huzuridagi jamoat fondi tomonidan mahalliy nodavlat notijorat tashkilotlari uchun eʼlon qilingan grant tanlovlari doirasida amalga oshirilgan ishlar yakunlari boʻyicha hisobot berildi va belgilangan vazifalar ijrosi muhokama qilindi.

Dastlab “Ijtimoiy fikr” respublika jamoatchilik fikrini oʻrganish Markazi tomonidan “Korrupsiya va korrupsiyaviy holatlarning jamiyat hayotiga tarqalganlik darajasini jamoatchilik ongida idrok etilishini baholash” jamoatchilik fikri soʻrovi natijalari taqdimoti amalga oshirildi.

Taʼkidlanganidek, soʻrov jarayonida mamlakatning barcha hududlarida 18 va undan katta yoshdagi 1100 nafar fuqaro tanlov asosida soʻraldi.

Tadqiqot doirasida jamoatchilik fikri soʻrovining natijalari asosida fuqarolarning korrupsiyaviy kelishuvlarda ishtirok etishining oldini olish hamda davlat va fuqarolik jamiyati institutlari uchun tegishli tavsiyalar berildi.

Shundan soʻng Jurnalistlarni qayta tayyorlash markazi tomonidan amalga oshirilgan “Fuqarolarning korrupsiyaga qarshi kurashish toʻgʻrisida xabardorligini oshirish: ommaviy axborot vositalarining oʻrni” loyihasining taqdimoti amalga oshirildi.

Mazkur loyiha doirasida Jurnalistlarni qayta tayyorlash markazi tomonidan korrupsiya masalalarini ommaviy axborot vositalarida yoritish, ushbu sohadagi qonunchilik va, jurnalistlarning surishtiruv mahoratini oshirish boʻyicha 2022-yil yanvar-iyul oylari davomida 7 ta hududda (Buxoro, Samarqand, Navoiy, Qarshi, Jizzax, Andijon, Toshkent. sh.) 164 nafar jurnalist, NNT vakillari va blogerlar uchun 2 kunlik treninglar oʻtkazildi.

Shuningdek, loyiha doirasida jurnalistlar, ushbu yoʻnalishda taʼlim olayotgan talabalar qiziquvchilariga tarqatma materiallar uchun loyiha mavzusida “Korrupsiyaga qarshi qurashishda OAV va fuqarolik jamiyati faolligini oshirish omillari” oʻquv qoʻllanma tayyorlandi. Qoʻllanmada korrupsiyaning oldini olishda fuqarolik jamiyati institutlarining ishtiroki, OAV oʻrni va roli toʻgʻrisida maʼlumot ular tomonidan amalga oshiriladigan ishlarning aniq mexanizmlari toʻgʻrisida maʼlumot beriladi.

Bundan tashqari, Yoshlar uchun korrupsiyaning oldini olish boʻyicha videorolik tayyorlanib, ijtimoiy tarmoqlar, hududiy telekanallar, shuningdek treninglar davomida namoyish etildi.

Jurnalistlar, NNT vakillar va blogerlar oʻrtasida “Korrupsiyadan barchamiz jabrlanamiz!” shiori ostida materiallar shu jumladan, jurnalistik surishtiruvlar, karikaturalar yoʻnalishlari boʻyicha tanlovi oʻtkazildi.

Taqdimotlar natijasida grant loyihalarining shaffofligi taʼminlandi, shu bilan birga ishtirokchi NNTlar korrupsiyaga qarshi kurashish yoʻnalishida amalga oshiriladigan loyihani amalga oshirish shakllari, bosqichlari, mexanizmlari toʻgʻrisida xabardor boʻlishdi. Oʻzlarini qiziqtirgan savollarga javob olishadi, taklif va tavsiyalarini bildirishdi.

Korrupsiyaga qarshi kurashish agentligi

Axborot xizmati