Joriy yilning 21-sentyabr kuni Agentlik rahbariyati va BMT GJBning Venadagi vakili, Korrupsiyaga qarshi taʼlim va yoshlarning imkoniyatlarini kengaytirish global resursi (GRACE) boshqaruvchisi Lulua Assad bilan uchrashuv tashkil etildi.

Maʼlumot uchun: BMT Bosh Assambleyasining 2021-yil iyun oyida Korrupsiyaga qarshi kurash boʻyicha maxsus sessiyasida qabul qilingan Siyosiy deklaratsiyasiga muvofiq, UNODC GRACE – Korrupsiyaga qarshi taʼlim va yoshlarning imkoniyatlarini kengaytirish boʻyicha global resurs tashabbusini ishga tushirildi. 

GRACEning asosiy maqsadi yoshlarning taʼlim, huquq borasida bilim olish imkoniyatlarini kengaytirishga, ularda korrupsiyaning oldini olish va unga qarshi kurashishga koʻnikmalarni shakllantirishga qaratilgan.

Uchrashuv davomida mamlakatimizda korrupsiyaga qarshi kurashish sohasida olib borilgan ishlar, jumladan taʼlim, maʼrifat, kadrlarni tayyorlash, oʻqituvchilarning malakasini oshirish va yoshlar bilan ishlash jarayonlari haqida maʼlumot berildi.

Oʻz oʻrnida xalqaro ekspert Lulua Assad tomonidan GRACE tashabbusining asosiy vazifasi – taʼlim va hamkorlikning oʻzgartiruvchi kuchidan foydalangan holda bolalar va yoshlar oʻrtasida korrupsiyaga qarshi kurash madaniyatini shakllantirish ekanligi taʼkidlandi. Bundan tashqari tashabbus boʻyicha kelgusida amalga oshirilishi rejalashtirilayotgan istiqbolli rejalar toʻgʻrisida maʼlumot berdi. Shuningdek, tashabbus doirasida yaratilgan sohaga doir oʻquv-amaliy seminar, trening dasturlari va ilmiy-amaliy qoʻllanmalarning mamlakatimizda joriy etish istiqbollari yuzasidan fikr almashishdi.

Shuningdek, tomonlar kelgusida yoshlar, universitet tadqiqotchilari va davlat xizmatchilari uchun korrupsiyaga qarshi taʼlim jarayoni, korrupsiyani oldini olish boʻyicha dasturlarni yaratish va tadqiqotlar yuzasidan qoʻshma tadbirlarni amalga oshirish kabi yoʻnalishlarda hamkorlik olib borish masalasi ham muzokaralar markazida boʻldi.

Uchrashuv yakunida tomonlar oʻzaro manfaatli hamkorlikni amalga oshirishga kelishib oldilar.
 

Korrupsiyaga qarshi kurashish agentligi
Axborot xizmati