Korrupsiyaga qarshi kurashish agentligi tomonidan joriy yilning 21-oktabr kuni Mahallabay ishlash va tadbirkorlikni rivojlantirish agentligining markaziy apparati hamda hududiy boshqarmalari xodimlari uchun "Korrupsiyaga qarshi kurashishdagi davlat siyosatining asosiy yo‘nalishlari" xususida seminar o‘tkazildi. 

Unda korrupsiyaga qarshi kurashish yo‘nalishida normativ-huquqiy asoslarni takomillashtirish, korrupsiyaga qarshi kurashishga mas’ul organlar faoliyatini rivojlantirish, Korrupsiyaga qarshi kurashish xalqaro standartlarini O‘zbekiston qonunchiligiga implementatsiya qilish, mamlakatimizning xalqaro reytinglardagi o‘rnini yaxshilash bo‘yicha amalga oshirilayotgan ishlar to‘g‘risida ma’lumot berildi. 

Ta’kidlandiki, o‘tgan muddat mobaynida Korrupsiyaga qarshi kurashish agentligi tomonidan korrupsiyaga qarshi kurashish samaradorligini oshirishga qaratilgan jami 24 ta normativ-huquqiy hujjatlar loyihalari ishlab chiqilib, ularning 6 tasi qabul qilingan. Normativ-huquqiy hujjatlar va ularning loyihalarida 300 dan ortiq korrupsiyaviy omillar aniqlanib, ularni bartaraf  etish bo‘yicha manfaatdor vazirlik va idoralarga takliflar kiritilgan. 

Seminarda ishtirokchilar faoliyatlari davomida duch kelayotgan ayrim masalalar yuzasidan savollarga batafsil javob olishdi, fikr hamda mulohazalar o‘rtaga tashlandi.

Korrupsiyaga qarshi kurashish agentligi Axborot xizmati