Korrupsiyaga qarshi kurashish hududiy kengashlari uchun muntazam ravishda tashkil etilayotgan navbatdagi seminarda davlat organlari faoliyatida korrupsiyaviy xavf-xatarlarni baholash amaliyoti haqida ma’lumot berildi.

Dastlab Agentlik vakillari tomonidan korrupsiyaviy xavf-xatarlarni baholashning huquqiy asoslari to‘g‘risida to‘xtalib o‘tildi.

Ma’lumot uchun: korrupsiyaviy xavf-xatarlarni baholash — davlat tashkilotining faoliyatini (vazifa va funksiyalarini) tahlil qilish, mavjud korrupsiyaviy xavf-xatarlarni aniqlash va ushbu xavf-xatarlar darajasini baholash bo‘yicha faoliyat.

2022-yil 12-yanvarda qabul qilingan “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari to‘g‘risida”gi PQ-81-son qaror bilan korrupsiyaga qarshi kurashish ishlarining samaradorligini reyting baholash indikatorlari belgilangan bo‘lib, indikatorlardan biri sifatida korrupsiyaviy xavf-xatarlarni aniqlash, baholash va ularni kamaytirish bo‘yicha chora-tadbirlarning amalga oshirilganligi ko‘rsatilgan.

2022-yil 11-maydagi “Davlat boshqaruvi sohasida korrupsiyaviy xavf-xatarlarni bartaraf etish mexanizmlarini takomillashtirish va ushbu sohada jamoatchilik ishtirokini kengaytirish chora-tadbirlari to‘g‘risida”gi PQ-240-son qaror bilan joriy yilning 1-sentabridan boshlab, davlat hokimiyati va boshqaruvi organlari, shu jumladan ularning hududiy bo‘linmalari, davlat unitar korxonalari va muassasalari, davlat ulushi 50 foizdan yuqori tashkilotlarning faoliyatida korrupsiyaviy xavf-xatarlarni majburiy baholash tartibi belgilandi.

Seminar davomida Hududiy kengashlar a’zolariga korrupsiyaviy xavf-xatarlarni aniqlash, baholash tartiblari, mezonlari, davriyligi, korrupsiyaviy xatarlar xaritasi, qaysi holatlarda baholash amalga oshirilishi, baholash natijalari bo‘yicha amalga oshiriladigan chora-tadbirlar to‘g‘risida ma’lumot berib o‘tildi.

Shuningdek, korrupsiyaviy xavf-xatarlarni baholash jarayonlarida yagona amaliyotni shakllantirish maqsadida Agentlik tomonidan ishlab chiqilgan Korrupsiyaviy xavf-xatarlarni aniqlash va baholash uslubiyoti ishtirokchilarga tanishtirib o‘tildi.

O‘z navbatida mazkur jarayonni hududlardagi tashkilotlarda ham samarali joriy etishda hududiy kengashlar ishtirokining aniq mexanizmlari to‘g‘risida fikr almashildi.

Korrupsiyaga qarshi kurashish hududiy kengashlari davlat tashkilotlari rahbarlarining korrupsiyaviy xavf-xatarlarni baholash va bartaraf etish bo‘yicha axborotlarini eshitish va natijasiga ko‘ra kamchiliklarga yo‘l qo‘ygan mansabdor shaxslarga nisbatan tegishli javobgarlik choralarini ko‘rish bo‘yicha takliflar kiritish hamda ijobiy natijalarga erishgan hududlardagi davlat tashkilotlarining tajribasini keng ommalashtirish bo‘yicha aniq choralarni ko‘rishi muhim ekanligi qayd etildi. 

Korrupsiyaga qarshi kurashish agentligi 
Axborot xizmati