Ijtimoiy tarmoqlarda Piskent tumani hokimi 1 trillion soʼmga yer ijaraga olganligi toʼgʼrisida xabarlar tarqalib, unda, xususan, Piskent tumani hokimi R.Rixsiev 2022 yil 6 sentabr kuni e-auksion platformasi orqali oʼtkazilgan savdolarda Toshkent viloyati Ohangaron tumani Markaziy qoʼrgʼon mahallasi hududidagi 397,9 gektar yer maydonini 30 yilga ijaraga berish yuzasidan oʼtkazilgan savdolarda 999 mlrd. 999 mln. 999 ming soʼmlik taklifi bilan gʼoliblikni qoʼlga kiritganligi bayon qilingan.

Keyinchalik R.Rixsiev ushbu xabarga munosabat bildirib, oʼzi yaylovni ijaraga olish niyatida boʼlmaganini, onlayn auksion tizimining ishlashini oʼz koʼzi bilan koʼrish uchun tajriba tariqasida shunday qilganini aytib raddiya bildirgan.

Biroq, shunga qaramasdan 2022 yil 13-sentabr kuni R.Rixsievning taʼsischiligida qishloq xoʼjaligiga ixtisoslashgan “Animals Service” MChJ tashkil etilganligi va u (oʼrganish oʼtkazilgan 23-oktyabr holatiga) mazkur korxona taʼsischiligidan chiqmaganligi maʼlum boʼldi. 

Oʼzbekiston Respublikasi Vazirlar Mahkamasining 1992 yil 6 martdagi “Tadbirkorlik faoliyati bilan shugʼullanish taqiqlangan mansabdor shaxslarning roʼyxati toʼgʼrisida”gi 103-sonli Qarorida davlat boshqaruv organlari xodimlari tadbirkorlik faoliyati bilan shugʼullanishi taqiqlangan.

Shuningdek, 2022 yil 8-avgust kuni qabul qilingan Oʼzbekiston Respublikasining “Davlat fuqarolik xizmati toʼgʼrisida”gi qonunning 13-moddasida davlat fuqarolik xizmatchisi tadbirkorlik faoliyati bilan shugʼullanishga haqli emasligi haqidagi qoida belgilandi (mazkur qonun 2022 yil 8-noyabrda kuchga kiradi).

Bundan tashqari, Oʼzbekiston Respublikasi Vazirlar Mahkamasining 2022 yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalarida davlat xizmatchilariga tadbirkorlik faoliyati bilan shugʼullanish taqiqlanishi hamda ushbu qoidalarning buzilishi qonunchilik hujjatlariga muvofiq intizomiy va boshqa turdagi javobgarlikka tortish uchun asos hisoblanishi koʼrsatilgan.

Shundan kelib chiqqan holda, Korrupsiya qarshi kurashish agentligi tomonidan mazkur masalani chuqur tahlil qilgan holda, qonunbuzilishi holatlarini bartaraf qilish hamda tegishli choralarni koʼrishni soʼrab Toshkent viloyat hokimligiga taqdimnoma kiritildi.

Taʼkidlash joizki, Korrupsiyaga qarshi kurashish agentligi tomonidan davlat xizmatchilari faoliyatida korrupsiyaviy xavf-xatarlar, xususan, manfaatlar toʼqnashuviga yoʼl qoʼyganlik holatlari tizimli ravishda oʼrganib kelinmoqda.

Jumladan, joriy yilning sentabr-oktyabr oylarida Buxoro, Samarqand, Jizzax, Navoiy, Sirdaryo, Qashqadaryo, Surxondaryo, Namangan, Fargʼona va Xorazm viloyatlarida davlat xizmatchilari tomonidan tadbirkorlik faoliyati bilan shugʼullanib kelinayotganligi holatlari joyiga chiqqan holda oʼrganildi.

Oʼrganish natijalariga koʼra, ushbu viloyatlarda jami 1378 nafar davlat xizmatchilari (138 nafari hokim va hokim oʼrinbosarlari, 148 nafari davlat banklari boshqaruvchisi va ularning oʼrinbosarlari, 1092 nafari hokim yordamchilari) davlat xizmati bilan birga (rahbar yoki taʼsischi sifatida) tadbirkorlik faoliyati bilan shugʼullanib kelayotganligi aniqlandi.

Shuningdek, Аgentlik tomonidan davlat xaridlari sohasida oʼtkazilgan oʼrganishlarda hududlarda davlat tashkilotlarining mansabdor shaxslari va ularning yaqin qarindoshlariga tegishli korxonalar davlat xaridlarida ishtirok etib, gʼolib boʼlganligi aniqlandi.

Xususan, 2021-2022 yilning 6 oyi davomida Buxoro viloyatida 340 ta holatda 34,3 mlrd soʼmlik davlat xaridlaridan 19 ta holatda tashkilot rahbari va moliyaviy masalalar boʼyicha oʼrinbosarlari, 72 ta holatda buxgalteriya xodimlari, 24 ta holatda ombor mudiri va taʼminot xodimlari, 30 ta holatda injener va texnik nazoratchilar, 20 ta holatda shartnomalarni huquqiy ekspertizasini amalga oshiruvchi yuristlar va qolgan holatda boshqa xodimlar xarid ijrochisining taʼsischisi (benefitsiari) boʼlgan.

Shu kabi Surxondaryo viloyatida 155 ta holatda 16,1 mlrd soʼmlik davlat xaridlaridan 67 ta holatda bosh hisobchi, hisobchi va iqtisodchilar, 60 ta holatda xoʼjalik va ombor mudirlari, 28 ta holatda boʼlim boshliqlari va boshqa xodimlar xarid ijrochisining taʼsischisi (benefitsiari) boʼlganligi aniqlandi.

Masalan, Surxondaryo viloyati hokimligi Yagona buyurtmachi xizmati injiniring kompaniyasi tomonidan 2021 yilda amalga oshirilgan Termiz shahridagi 6-maktab binosini rekonstruktsiya qilish boʼyicha 8 mlrd. soʼmlik davlat xaridida ushbu kompaniyaning yetakchi mutaxassisi taʼsischiligidagi masʼuliyati cheklangan jamiyat bilan toʼgʼridan-toʼgʼri shartnoma tuzilgan.

Xuddi shunday, Samarqand viloyatida 277 ta holatda 10,9 mlrd. soʼmlik, Fargʼona viloyatida 158 ta holatda 8,1 mlrd. soʼmlik, Sirdaryo viloyatida 20 ta holatda 1,6 mlrd. soʼmlik, Qashqadaryo viloyatida 66 ta holatda 1,1 mlrd. soʼmlik, Navoiy viloyatida 14 ta holatda 0,3 mlrd.soʼmlik davlat xaridlari boʼyicha tuzilgan shartnomalarda affillanganlik va manfaatlar toʼqnashuvi holatlariga yoʼl qoʼyilgan.

Ushbu holatlarni bartaraf qilish va kelgusida yoʼl qoʼymaslik haqida taqdimnomalar kiritildi, shuningdek, davlat xaridlarida aniqlangan qonunbuzilishi holatlari boʼyicha huquqiy baho berish uchun prokuratura organlariga yuborildi.

Korrupsiyaga qarshi kurashish agentligi tomonidan davlat xizmatchilari tomonidan tadbirkorlik faoliyati bilan shugʼullanish orqali korrupsiyaviy xavf-xatarlarga yoʼl qoʼyilishining oldini olish va bartaraf etishga qaratilgan tadbirlar davom ettirilmoqda.

Korrupsiyaga qarshi kurashish agentligi 
Аxborot xizmati