Joriy yilning 3-noyabr kuni Korrupsiyaga qarshi kurashish agentligi direktori oʻrinbosari U.Tuxtasheva hamda Koreya Respublikasining Korrupsiyaga qarshi kurashish va fuqarolik huquqlari boʻyicha komissiyasi (ACRC) rahbariyati, shuningdek, BMT TDning  Oʻzbekistondagi doimiy vakili M.Dimovska oʻrtasida onlayn uchrashuv boʻlib oʻtdi.

Unda asosiy e’tibor fuqarolarning korrupsiyaga oid murojaatlari bilan ishlash tizimini takomillashtirish, xabar beruvchilarni himoya qilish va ularni ragʻbatlantirish amaliyotini rivojlantirish masalalariga qaratildi.

Xususan,  Oʻzbekistonda fuqarolarni korrupsiya faktlari toʻgʻrisida tezkor xabardor qilish imkoniyatlarini kengaytirishni nazarda tutuvchi “E-Anticor.uz” elektron platformasini ACRC tomonidan ishlab chiqilgan “Clean Portal” (“Shaffof portal”)  platformasining ilgʻor yutuqlari, zamonaviy qulayliklari asosida modernizatsiya qilish va bu borada tajriba almashish hamda oʻzaro manfaatli hamkorlikni yangi bosqichda davom ettirish masalalari atroflicha muhokama qilindi.

Muloqotlar avvalida ACRCning Tekshiruvni rejalashtirish departamenti direktori  Jeong Tek O  “Clean Portal”ning ishlab chiqish  jarayoni vazifa va maqsadlari, imkoniyat va qulayliklari xususida batafsil ma’lumot berdi.

Ma’lumot uchun:  5 yil avval ishga tushirilgan mazkur raqamli platformaning asosiy maqsadi aholini xabar berishda faolligini oshirish hamda davlat siyosatini ishlab chiqish uchun asos boʻluvchi faktlarni yigʻish hisoblanadi.

Aholi dastur orqali korrupsiya toʻgʻrisida koʻp yuborilayotgan murojaatlar tendensiyasi, sohalar va hududlarda kesimida bazaga kelib tushgan murojaatlar soni va hal etilganligi yuzasidan statistik ma’lumotlarni olish imkoniga ega.

Davlat organlari uchun  esa  murojaatlarning mazmuni, sohasi, organi, OAVda  e’lon qilingan xabar va murojaatlarning hal etilishi holati, korrupsiya sodir etganlikda ayblanib, ishdan chetlatilgan davlat xizmatchilari toʻgʻrisida va boshqa turdagi ma’lumotlarni olish qulayligi yaratilgan.

Ta’kidlanishicha, platformaga kiruvchilar korrupsiya hamda jamoatchilik manfaatlariga zarar yetkazuvchi holatlar toʻgʻrisida murojaat qaysi tashkilotga taalluqliligidan qat’iy nazar onlayn murojaat qoldirishi mumkin. Shuningdek, murojaatchi oʻzi uchun kompensatsiya (ragʻbatlantirish) va himoya soʻray oladi.  Raqamli tizim murojaatchining shaxsiy ma’lumotlarini sir tutgan holda murojaatni ishonchli shaxslar orqali qabul qiladi.

Ma’lumot uchun: “Clean Portal” dasturi doirasida “Clean Forum” oynasi tashkil etilgan boʻlib, vazirlik va idoralarda korrupsiyaga qarshi kurashish boʻyicha olib borilgan ishlar, shuningdek, korrupsiyaviy omillar toʻgʻrisida ma’lumotlarni ochiqlash va almashish imkonini beradi.

Mazkur oynada barcha vazirlik va idoralar oʻzlarida korrupsiyaga qarshi kurashish boʻyicha olib borilgan ishlar toʻgʻrisida ma’lumotlarni (ichki hujjatlar, korrupsiyaga oid ishlar, xavf-xatarlarni baholash natijalari) kiritib boradi hamda fuqarolar ular bilan tanishib chiqa oladi.

Bugungi kunda 550 dan ortiq davlat organlari va tashkilotlari ushbu forumda ma’lumotlarni kiritib boradi.

Muloqot mobaynida korrupsiya toʻgʻrisidagi xabar yoʻllash va qayta ishlashning amaldagi mexanizmini baholash, “Clean Portal”  yondashuvini “E-Anticor.uz” elektron platformasiga moslashtirish yuzasidan oʻzaro fikr almashildi.

Agentlik xodimlariga korrupsiya holatlari haqida xabar berishning raqamli imkoniyatlarini takomillashtirish boʻyicha amaliy tajriba va koʻnikmalarga ega boʻlish imkonini beruvchi oʻquv dasturlarini tashkil etish, Koreya tajribasi asosida Oʻzbekistonda raqamli vositalarni takomillashtirish boʻyicha oʻzaro hamkorlikda yangi loyihalarni ishlab chiqish masalalari koʻrib chiqildi.

Korrupsiyaga qarshi kurashish agentligi

Axborot xizmati