Birlashgan Millatlar Tashkiloti Giyohvand moddalar va jinoyatchilik boʻyicha boshqarmasining taklifiga asosan, Korrupsiyaga qarshi kurashish agentligi va Bosh prokuratura vakillaridan iborat Oʻzbekiston delegatsiyasi BMT Korrupsiyaga qarshi konvensiyasi obzori boʻyicha guruh yigʻilishlari, aktivlarni qaytarish boʻyicha ochiq tarkibdagi hukumatlararo ishchi guruh hamda Konvensiya doirasida xalqaro hamkorlikni rivojlantirish boʻyicha ochiq tarkibdagi ekspertlarning hukumatlararo yigʻilishlarida ishtirok etmoqda.

Tadbir Avstriyada joylashgan Vena Xalqaro markazida boʻlib oʻtayotgan boʻlib, unda 100 dan ziyod davlatlar ishtirok etmoqda. 

Yigʻilishlar davomida Konvensiya obzori mexanizmi ishlar tartibini takomillashtirish, Konvensiyaga a’zo-davlatlarni 2 bosqich obzoridan oʻtkazish masalalari hamda Konvensiya doirasida 2023-yilda oʻtkazilish rejalashtirilgan 10 Konferensiya tashkiliy masalalari muhokama qilinadi. 

Ma’lumot uchun: bugungi kunda Oʻzbekiston Respublikasi Konvensiyaning 2 bosqich obzoridan oʻtayotgan boʻlib, Nigeriya va Maldiv davlatlari korrupsiyaga qarshi kurashish idoralari vakillari hamda BMT GJB ekspertlari tomonidan Konvensiyaning II va V boblari Oʻzbekistonda implementatsiya qilinganlik masalalari oʻrganilmoqda. 

5 ish kuni davomida boʻlib oʻtadigan tadbirlarda Konvensiyaga a’zo-davlatlar tomonidan mazkur xalqaro hujjat bajarilish masalalari boʻyicha duch kelayotgan muammo va qiyinchiliklar, ilgʻor tajriba hamda obzor mexanizmini takomillashtirish boʻyicha fikr-mulohazalar muhokama qilinadi.

Korrupsiyaga qarshi kurashish agentligi 
Axborot xizmati