Joriy yilning 8 noyabr kuni Korrupsiyaga qarshi kurashish agentligi tomonidan Konrad Adenaur nomidagi jamgʻarmaning Markaziy Osiyo boʻyicha mintaqaviy vakolatxonasi koʻmagida “E-anticor.uz” elektron platformasidan foydalanish tartibi va korrupsiyaviy xavf-xatarlarni baholash amaliyoti” mavzusida ikki kunlik seminar-trening mashgʻulotlari boshlandi.

Seminar-treningdan koʻzlangan asosiy maqsad xalqaro tashkilotlar va xorijiy ekspertlarni jalb etgan holda davlat tashkilotlarida korrupsiyaviy xavf-xatarlarni baholashga masʼul (100 nafar) xodimlar uchun reyting baholash, shu jumladan, elektron platformadan foydalanish tartibini tushuntirish, ularning bu boradagi bilim va koʻnikmalarini oshirishdan iborat boʻldi.

Mashgʻulotlarda davlat organlari va tashkilotlari, ularning hududiy va tarkibiy boʻlinmalarida korrupsiyaviy xavf-xatarlarni baholash amaliyoti yuzasidan taqdimot oʻtkazildi.

Maʼlumot uchun: korrupsiyaviy xavf-xatarlarni baholash — davlat tashkilotining faoliyatini (vazifa va funksiyalarini) tahlil qilish, mavjud korrupsiyaviy xavf-xatarlarni aniqlash va ushbu xavf-xatarlar darajasini baholash boʻyicha faoliyat.

Taʼkidlanganidek, 2022-yil 12-yanvarda qabul qilingan “Korrupsiyaga qarshi kurashish ishlarining samaradorligini reyting baholash tizimini joriy etish chora-tadbirlari toʻgʻrisida”gi PQ-81-son qaror bilan korrupsiyaga qarshi kurashish ishlarining samaradorligini reyting baholash indikatorlari belgilangan boʻlib, indikatorlardan biri sifatida korrupsiyaviy xavf-xatarlarni aniqlash, baholash va ularni kamaytirish boʻyicha chora-tadbirlarning amalga oshirilganligi koʻrsatilgan.

Maʼlumki, 2022-yil 11-maydagi “Davlat boshqaruvi sohasida korrupsiyaviy xavf-xatarlarni bartaraf etish mexanizmlarini takomillashtirish va ushbu sohada jamoatchilik ishtirokini kengaytirish chora-tadbirlari toʻgʻrisida”gi PQ-240-son qaror bilan joriy yilning 1-sentyabridan boshlab, davlat hokimiyati va boshqaruvi organlari, shu jumladan ularning hududiy boʻlinmalari, davlat unitar korxonalari va muassasalari, davlat ulushi 50 foizdan yuqori tashkilotlarning faoliyatida korrupsiyaviy xavf-xatarlarni majburiy baholash tartibi belgilandi.

Korrupsiyaviy xavf-xatarlarni baholash jarayonlarida yagona amaliyotni shakllantirish maqsadida Agentlik tomonidan Korrupsiyaviy xavf-xatarlarni aniqlash va baholash uslubiyoti ishlab chiqildi va joriy yilning 31-avgust kuni tasdiqlandi.

Seminar-treningda ishtirokchilar mazkur Uslubiyot bilan yaqindan tanishtirildi. 

Unga koʻra, davlat tashkiloti tomonidan korrupsiyaviy xavf-xatarlar har yili 1-martgacha baholanadi. Davlat tashkiloti faoliyatidagi (vazifa va funksiyalardagi) korrupsiyaviy xavf-xatarlar ichki va tashqi axborot manbalari asosida aniqlanib, korrupsiyaviy xavf-xatarlarning darajasi past, oʻrta, yuqori oʻlchovlarda baholanadi.

Korrupsiyaviy xavf-xatarlarni aniqlash va baholash natijalari asosida davlat tashkilotining umumlashtirilgan korrupsiyaviy xavf-xatarlar xaritasi ishlab chiqiladi va “E-anticor.uz” elektron platformasiga har yili 1-fevralga qadar kiritiladi.

Platformada joylashtirilgan davlat tashkilotlarining korrupsiyaviy xavf-xatarlar xarita loyihalari asosida avtomatik ravishda korrupsiyaga moyil boʻlgan munosabatlar elektron reyestri shakllantiriladi.

Davlat tashkiloti rahbari har yili 1-martgacha korrupsiyaviy xavf-xatarlar xaritasi hamda korrupsiyaga qarshi kurashish boʻyicha dasturini “E-anticor.uz” elektron platformasi orqali tasdiqlaydi.

Seminar-treningda, shuningdek, davlat tashkilotlari faoliyatida korrupsiyaviy havf-xatarlarni baholash hamda  davlat tashkilotlari faoliyatini korrupsiyaga qarshi kurashish ishlarining samaradorligini reyting baholashdan oʻtkazish amaliyotlari boʻyicha xorijiy tajriba, Reyting baholash yoʻnalishlari va indikator koʻrsatkichlarini tahlil qilish usullari va aniq mezonlari ham koʻrib chiqildi.

Mashgʻulotlar mobaynida Gonkong Korrupsiyaga qarshi mustaqil komissiyasi Korrupsiyaning oldini olish departamenti direktori o'rinbosari Kenni Fok tomonidan (onlayn shaklda) davlat tashkilotlari faoliyatida korrupsiyaviy xavf-xatarlarni baholash boʻyicha mazkur mamlakat tajribasi yuzasidan taqdimot qilindi.

Seminar-treningda davlat tashkilotlariga korrupsiyaga qarshi kurashishga oid tegishli ichki idoraviy hujjatlar ishlab chiqish hamda amaliyotga tatbiq etishda uslubiy va amaliy yordam koʻrsatish maqsadida Agentlik tomonidan tayyorlangan Korrupsiyaviy havf-xatarlarni aniqlash va baholashning huquqiy asoslari, Korrupsiyaga qarshi kurash ishlarining samaradorligini reyting baholash tizimi orqali reyting baholashdan oʻtish boʻyicha tavsiyalar  toʻplami ishtirokchilarga taqdim etildi.  

Korrupsiyaga qarshi kurashish agentligi

Axborot xizmati