Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin boʻlgan sovgʻa qiymati, shuningdek, uni tasarruf etish tartibi toʻgʻrisidagi Nizom loyihasi jamoatchilik muhokamasi (regulation.gov.uz)ga qoʻyildi.

Unga koʻra:

Davlat fuqarolik xizmatchisi xizmat safarlari, xalqaro va boshqa rasmiy tadbirlar munosabati bilan unga taqdim etilgan har qanday sovgʻa toʻgʻrisida 3 ish kuni ichida davlat organining korrupsiyaga qarshi kurashish boʻyicha ichki nazorat tuzilmasiga xabar beradi.

Korrupsiyaga qarshi kurashish boʻyicha ichki nazorat tuzilmasi tomonidan sovgʻaning qiymatini aniqlash va baholash amalga oshiriladi.

Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin boʻlgan sovgʻa qiymati miqdori BHMning 5 baravari etib belgilanmoqda.

Sovgʻaning miqdori ushbu nizom bilan belgilangan miqdordan oshgan taqdirda, belgilangan miqdordan oshgan qismi davlat fuqarolik xizmatchisi tomonidan davlat tashkilotiga toʻlov qilish orqali sovgʻa sotib olinadi va tasarruf etiladi yoki davlat fuqarolik xizmatchisi sovgʻaning belgilangan miqdordan oshgan qismiga toʻlov qilib sotib olishni rad etsa, davlat organi yoki tashkiloti tasarrufiga oʻtkaziladi.  

Eslatib oʻtamiz: “Davlat fuqarolik xizmati toʻgʻrisida”gi OʻRQ-788-son Qonunining 18-moddasiga koʻra, davlat fuqarolik xizmatchilari xizmat safarlari vaqtida, shuningdek xalqaro va boshqa rasmiy tadbirlar munosabati bilan sovgʻalar olishi mumkin.

Davlat fuqarolik xizmatchisining xizmat vakolatlarini jismoniy va yuridik shaxslar manfaatlarini koʻzlab bajarish yoki bajarmaslik evaziga ulardan har qanday sovgʻalar olishi taqiqlanadi.

Jamoatchilik muhokamasi joriy yilning 22-noyabr sanasiga qadar davom etadi.

Muhokamalarda takliflaringiz bilan ishtirok eting, davlat fuqarolik xizmati sohasidagi munosabatlarni tartibga solishga qaratilgan qonunchilik faoliyatida ishtirok eting!

Korrupsiyaga qarshi kurashish agentligi

Axborot xizmati