Joriy yilning 14 noyabr kuni Agentlik rahbariyati Xalqaro valyuta jamg‘armasining O‘zbekiston bo‘yicha missiyasi rahbari R.Roden boshchiligidagi delegatsiyani qabul qildi.

Maʼlumot uchun: Ikki tomon vakillari o‘rtasida joriy yilning aprel oyida uchrashuv o‘tkazilib, unda O‘zbekistonda korrupsiyaga qarshi kurashish siyosatining olib borilishi, bu borada Agentlikning vazifa va vakolatlari xususida o‘zaro fikr almashilgan edi.

Muloqotni Agentlik direktori o‘rinbosari U.Tuxtasheva ochib, korrupsiyaga qarshi kurashish sohasidagi so‘nggi islohotlar jarayoni, xususan, qonunchilikdagi aksilkorrupsiya siyosatini amalga oshirishda Agentlik va boshqa mutasaddi organlar faoliyatida eng muhim yangilik va o‘zgarishlardan xabardor etdi.

Jumladan, davlat organlari va tashkilotlarida korrupsiyaga qarshi kurashish ishlarining samaradorligini reyting baholash tizimi yo‘lga qo‘yilganligi, davlat organlari va tashkilotlarida ochiqlik siyosatini yo‘lga qo‘yish bo‘yicha amalga oshirilayotgan ishlar samaradorligi, Ochiqlik indeksi joriy etilishi, davlat xaridlari sohasini tartibga solishdagi ishlar va yangiliklar haqida to‘liq maʼlumot berib o‘tdilar.

Xalqaro tashkilot vakili R.Ruden juda qisqa vaqt ichida erishilgan bu kabi yutuqlarga yuqori baho berdi.

Jamg‘arma vakillari tomonidan davlat xizmatchilarining daromad va mol-mulkini deklaratsiya qilish tizimi joriy etilishining buguni kundagi holati, ochiq maʼlumotlar ro‘yxatini kengaytirish, davlat xaridlarini amalga oshirishda o‘rta va kichik tadbirkorlik subyektlari ishtirokini oshirish, mazkur yo‘nalishdagi muammo va kamchiliklarni bartaraf etish borasida olib borilayotgan chora-tadbirlarga ham alohida qiziqish bildirildi.

Muloqot mobaynida, shuningdek, korrupsiyaga qarshi kurashuvchi organlar, fuqarolik jamiyati institutlari, xususan, ommaviy axborot vositalari bilan Agentlik o‘rtasida olib borilayotgan ishlar va hamkorlik masalalari muhokama qilindi.

Korrupsiyaga qarshi kurashish agentligi

Axborot xizmati