Joriy yilning 16-noyabr kuni Agentlik rahbariyati va Xalqaro hamkorlik boʻyicha Germaniya jamiyati Vakolatxonasi (GIZ) vakillari oʻrtasida uchrashuv tashkil etildi.
Uchrashuvda GIZning amaldagi “Markaziy Osiyoda huquqiy davlatchilikni rivojlantirish” dasturi tomonidan ishlab chiqilgan “Oʻzbekistonda samarali boshqaruv” loyihasi doirasida Agentlik bilan amalga oshiriladigan ishlar muhokama etildi.

Dastlab, mamlakatimizda korrupsiyaga qarshi kurashish sohasida olib borilayotgan chora-tadbirlar, qoʻllanilayotgan normativ-huquqiy hujjatlar, mazkur yoʻnalishda Agentlik tomonidan amalga oshirilayotgan loyihalar toʻgʻrisida qisqacha ma’lumot berildi.
Shundan soʻng, “Oʻzbekistonda samarali boshqaruv” loyihasining asosiy maqsadlari va faoliyat yoʻnalishlari, amalga oshirish muddatlari, bunda Oʻzbekiston tomonidan jalb etilgan hamkor vazirlik va idoralar yuzasidan fikr almashildi.

Ta’kidlanganidek, mazkur loyiha doirasida korrupsiyaga qarshi kurashish yoʻnalishida kadrlar salohiyatini kuchaytirish, texnik koʻmak koʻrsatish, davlat tashkilotlari faoliyatida hamda davlat xaridlari jarayonida ochiqlikni ta’minlash, shuningdek, korrupsiyaning oldini olishda informatsion texnologiyalardan keng foydalanish masalalarida hamkorlikni qilish koʻzda tutilgan. 

Shu bilan bir qatorda, xorijiy vakillar tomonidan Oʻzbekistonda korrupsiyaga qarshi kurashish boʻyicha strategiyalar, qonun hujjatlari va loyihalarni ishlab chiqishda ekspertlik koʻmagini koʻrsatishga tayyor ekanliklari ma’lum qilindi.

Korrupsiyaga qarshi kurashish agentligi

Axborot xizmati