Korrupsiyaga qarshi kurashish agentligi tomonidan hududiy kengashlar uchun tashkil etilayotgan navbatdagi seminarda Korrupsiyaga qarshi ichki nazorat tuzilmalari faoliyati va Korrupsiyaga oid huquqbuzarlik haqida xabar bergan shaxslarni ragʻbatlantirish tartibi haqida fikr almashildi.

Dastlab  Korrupsiyaga qarshi ichki nazorat tuzilmalari faoliyati toʻgʻrisida ma’lumot berildi.

Taqdimotda korrupsiyaga qarshi «komplayens-nazorat» tuzilmalari faoliyat yoʻnalishlari, sohaning huquqiy asoslari, mazkur tizimni joriy etish yuzasidan amalga oshirilgan ishlar, sohani tatbiq etishda yuzaga kelayotgan muammolar haqida soʻz yuritildi.

Seminar davomida ichki nazorat tuzilmalari faoliyati samaradorligini oshirish boʻyicha amalga oshiriladigan ishlar, xususan, hududiy kengashlar vazifalariga ham alohida toʻxtalib oʻtildi.

Komplayens-nazorat tizimi boʻyicha qabul qilingan ichki idoraviy hujjatlarning ijrosini toʻliq ta’minlash, aloqa kanallari tashkil etilgani va samarali ishlayotganini monitoring qilib borish, reyting baholash boʻyicha ishlarni tashkil etish kabi vazifalarni muvofiqlashtirish lozimligi ta’kidlandi.

Seminarning ikkinchi qismida Vazirlar Mahkamasining 2020-yil 31-dekabrdagi 829-son qarori bilan tasdiqlangan “Korrupsiyaga oid huquqbuzarlik haqida xabar bergan yoki korrupsiyaga qarshi kurashishga boshqa tarzda koʻmaklashgan shaxslarni ragʻbatlantirish tartibi toʻgʻrisida”gi nizom mazmun-mohiyati yuzasidan fikr almashishdi.

Unda nizomda belgilangan qoidalar va ularni amaliyotda qoʻllashga oid masalalarga toʻxtalib oʻtildi.

Ushbu nizom qoidalarini Korrupsiyaga qarshi kurashish hududiy kengashlari aholi va korxona va tashkilotlar orasida tashkil etiladigan tadbirlarda faol targʻib qilish lozimligi bildirildi.

Korrupsiyaga qarshi kurashish agentligi

Axborot xizmati