Joriy yilning 16 noyabr kunidan boshlab Korrupsiyaga qarshi kurashish agentligi direktori boshchiligidagi O‘zbekiston delegatsiyasi Fransiya davlatida amaliy tashrif bilan bo‘lib turibdi.

Xususan, tashrifning dastlabki kuni Iqtisodiy hamkorlik va taraqqiyot tashkiloti (IHTT)ning Korrupsiyaga qarshi tarmog‘i (ACN) tomonidan Sharqiy Yevropa va Markaziy Osiyo mintaqasida korrupsiyaga qarshi kurashish bo‘yicha qaror qabul qiluvchilarning Yuqori darajadagi uchrashuvi bo‘lib o‘tdi.

Maʼlumot uchun: Mazkur oliy darajadagi yig‘ilishda korrupsiyaga qarshi kurashish bo‘yicha kengashlar va parlament qo‘mitalari raislari, vazirlar hamda korrupsiyaga qarshi kurashish va halollikka masʼul idoralar rahbarlari, korrupsiyaga qarshi kurashishga hissa qo‘shayotgan jamoatchilik tashkilotlari yetakchilari ishtirok etmoqda.

Uchrashuvda Agentlik direktori A.Burxanov tomonidan yurtimizda korrupsiyaning oldini olish va unga qarshi kurashish sohasida olib borilayotgan institutsional islohotlar, jumladan, davlat xizmatiga halollik standartlarini joriy etish, davlat organlari va tashkilotlari faoliyati ochiqligi va shaffofligini taʼminlash, davlat xaridlari va tadbirkorlik sohasida halollik tamoyillarini joriy qilish hamda korrupsiyaviy jinoyatlar uchun javobgarlikni kuchaytirish borasida amalga oshirilayotgan chora-tadbirlar va o‘zgarishlar to‘g‘risida maʼlumot berildi.

“Korrupsiyaga qarshi kurashish va uning oldini olishda ilg‘or xalqaro standartlarni joriy etish milliy qonunchilikni yana-da takomillashtirish va institutsional islohotlarni amalga oshirish, shuningdek, erishilgan yutuqlarni obyektiv baholash, mavjud qiyinchiliklarni aniqlash va ularni bartaraf etishga xizmat qiladi” - A.Burxanov.

Shu bilan birga, uchrashuv davomida korrupsiyaga qarshi kurashishda xalqaro va mintaqaviy hamkorlik ko‘lamini kengaytirish masalalari muhokama qilindi.

Korrupsiyaga qarshi kurashish agentligi

Axborot xizmati