Korrupsiyaga qarshi kurashish agentligi vakili Yaponiyaning xalqaro hamkorlik agentligi JICA (Japan International Cooperation Agency) tomonidan “Korrupsiyaviy jinoyatlardan olinadigan daromadlarni aniqlash, ularni xatlash va musodara qilish: muammolar va yechimlar” mavzusida tashkil etilgan oʻquv kursida ishtirok etmoqda.

Mazkur oʻquv kursi 20 dan ortiq davlatning korrupsiyaga qarshi kurashish, prokuratura va sud organlari vakillarini oʻzida jamlagan.  

Unda  korrupsiyaga qarshi kurashishga mas’ul boʻlgan idoralar xodimlarining iqtisodiy sohadagi korrupsiyaning oldini olish, xususan, korrupsiyaviy jinoyatlardan olinadigan daromadlarni aniqlash, ularni xatlash va musodara qilishga qaratilgan samarali choralar boʻyicha  bilimlarini oshirishga qaratilgan taqdimot va mashgʻulotlar boʻlib oʻtmoqda.

Shuningdek, shu kunga qadar Yaponiya, Braziliya, Tailand, Misr, Pokiston va Qozogʻiston davlatlarining ishtirokchilari korrupsiyaga qarshi kurashishga mas’ul organlar faoliyati,  sohadagi qonunchilik tizimi, korrupsiyaga oid jinoyatlarni tergov qilish va oʻgʻirlangan aktivlar (mulklar)ni qaytarish masalalarida oʻz mamlakatlari tajribasi bilan tanishtirib oʻtdi. 

Agentlik vakili ham  oʻquv kursi ishtirokchilariga mamlakatimizda korrupsiyaga qarshi kurashish sohasida amalga oshirilayotgan islohotlar, jumladan, korrupsion huquqbuzarliklarning oldini olish va bartaraf etish, sabab va shart-sharoitlarini aniqlashga qaratilgan ijobiy oʻzgarishlar  va yangiliklar xususida taqdimot qildi.

Shu kabi taqdimotlar orqali ishtirokchilar korrupsiyaga qarshi kurashish sohasidagi xalqaro tajriba va amaliyotning  ilgʻor yutuqlari bilan yaqindan tanishtirilmoqda, shuningdek, mavjud muammo va kamchiliklarni tahlil etilib, aniq amaliy takliflar ishlab chiqilmoqda.

Korrupsiyaga qarshi kurashish agentligi

Axborot xizmati