Joriy yilning 2 dekabr kuni Korrupsiyaga qarshi kurashish agentligi tomonidan O‘zbekiston Respublikasi Korrupsiyaga qarshi kurashish milliy kengashi hamda BMT TD hamkorligida Korrupsiyaga qarshi kurashish hududiy kengashlari uchun “Hududlarda davlat organlarining korrupsiyaga qarshi kurashish faoliyatini samarali muvofiqlashtirish”  mavzusida seminar o‘tkazildi.

Unda Korrupsiyaga qarshi kurashish hududiy kengashlari kotiblari, Kengash tarkibidagi NNTlar va kengashga masʼul kotibiyat xodimlari ishtirok etdi.

Maʼlumot uchun: Korrupsiyaga qarshi kurashish hududiy kengashlari Milliy kengash qaroriga asosan, 2021-yilda 14 ta hududiy birlikda tashkil etilgan.

Korrupsiyaga qarshi kurashish hududiy kengashining asosiy maqsadi korrupsiyaga qarshi kurashish sohasidagi davlat siyosatining hududlarda amalga oshirilishini muvofiqlashtirib borish hisoblanadi.

Hududiy kengashlar hududiy boshqarmalar rahbarlari, deputatlar, huquqni muhofaza qiluvchi organlar, nodavlat notijorat tashkilotlari, ommaviy axborot vositalari va biznes hamjamiyati vakillaridan iborat kollegial organdir.

Mazkur tadbir hududiy kengashlar faoliyati samaradorligini oshirish, kengash masʼul kotiblari va boshqa aʼzolarining kengashlar faoliyatini to‘g‘ri tashkil etishga oid ko‘nikmalarini yuksaltirish, hududiy kengashlar o‘rtasida tajriba almashish, o‘zaro muloqotni yaxshilash va yo‘l qo‘yilayotgan kamchiliklarni hamkorlikda bartaraf etish maqsadida tashkil etildi.

Seminar davomida dastlab, hududiy kengashlar oldida turgan dolzarb masalalar va ularni bartaraf etish yuzasidan ko‘rilishi lozim bo‘lgan choralar haqida fikr almashildi. Faoliyati ijobiy yo‘lga qo‘yilgan hududiy kengashlar faoliyatining taqdimoti amalga oshirildi.

Shuningdek, seminar mobaynida hududiy kengashlar faoliyatini namunali tashkil etish, Milliy kengash va Agentlik, shuningdek, hududiy davlat organlari va tashkilotlar bilan ishlash, NNT, OAV va jamoatchilik bilan samarali hamkorlikni yo‘lga qo‘yish, korrupsiyaga qarshi kurashishda jamoatchilik nazoratini taʼminlash masalalarida ishtirokchilarga batafsil maʼlumot berildi.  

Xususan, hududiy kengashlar faoliyatini reyting baholash metodikasiga asosan ishni tashkil etish masalalari muhokama etilib, bu borada ishni namunali tashkil etgan kengash aʼzolarining taqdimotlari o‘tkazildi.

Bundan tashqari, hududiy kengashlari aʼzolari uchun jamoatchilik monitoringi va jamoatchilik eshituvini samarali tashkil etishning muhim jihatlari xususida o‘zaro fikr almashildi.

Seminar mobaynida xalqaro ekspertlar tomonidan hududiy kengashlarning fuqarolik jamiyati va ommaviy axborot vositalari bilan o‘zaro hamkorligi, korrupsiyaga qarshi loyiha va dasturlarni amalga oshirishda gender yondashuvi, xususan, mahalliy tashabbuslarini qanday rivojlantirish kerakligi yuzasidan zarur bilimlar, amaliy tavsiyalar berildi.

Mahalliy darajada korrupsiyaga qarshi kurash organlarining ishini muvofiqlashtirish va bu borada Finlyandiya tajribasi oid taqdim etilgan muhim maʼlumotlar ham ishtirokchilar uchun ahamiyatli bo‘ldi. 

Tadbir yakunida ishtirokchilar tomonidan kengash faoliyatini jonlantirish va samaradorligini oshirishga qaratilgan amaliy takliflarni ishlab chiqish va faoliyatlariga joriy etish vazifasi yuklatildi.

Seminar ishtirokchilariga sertifikat topshirildi.

Korrupsiyaga qarshi kurashish agentligi

Axborot xizmati