Davlat geologiya va mineral resurslar qo‘mitasi 9-dekabr – Xalqaro korrupsiyaga qarshi kurashish kuni arafasida ISO 37001:2016 xalqaro standartiga (Korrupsiyaga qarshi kurashish menejmenti tizimi) muvofiqlik sertifikatini qo‘lga kiritdi. 

Bugun qo‘mitada mazkur sana munosabati bilan Korrupsiyaga qarshi kurashish agentligi, Bosh prokuratura va “CERT International” xalqaro auditorlik kompaniyasi maʼsul xodimlari ishtirokida o‘tkazilgan tadbirda bu haqda maʼlum qilindi. 

Tadbirda dastlab Agentlik masuʼl xodimi N.Samandarova tomonidan mamlakatimizda korrupsiyaga qarshi kurash sohasida amalga oshirilayotgan islohotlar va Agentlikning vakolatlari to‘g‘risida taqdimot qilindi. 

Taqdimot mobaynida Agentlik vakili korrupsiyaga qarshi ichki nazorat tuzilmalari (“komplayens-nazorat”) korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish choralarini ko‘rishda qisqa vaqt ichida o‘zining muhim ahamiyati va samarasini amalda namoyon etayotganini alohida qayd etdi. 

"O‘zDST 37001:2019 milliy standarti" xalqaro standart talablariga muvofiq “CERT International” xalqaro trening kompaniyasi mutaxassislari tomonidan qo‘mitaning korrupsiyaga qarshi kurash menejment tizimi auditdan muvaffaqiyatli o‘tganligi ham buning o‘ziga xos dalolatidir. 

Tadbirda “CERT International” xalqaro trening kompaniyasi vakili tomonidan qo‘mitaga mazkur sertifikatlar taqdim etildi.

Korrupsiyaga qarshi kurashish agentligi 

Axborot xizmati