Joriy yilning 11-12 aprel kunlari Jurnalistlarni qayta tayyorlash markazi tomonidan “O‘zbekiston jurnalistlari va blogerlarining korrupsiya masalalariga oid  jurnalist surishtiruvini o‘tkazish bo‘yicha salohiyatini oshirish” mavzusida trening bo‘lib o‘tdi.

Maʼlumot uchun: Trening O‘zbekiston jurnalistlarni qayta tayyorlash markazi va Konrad Adenauer jamg‘armasi bilan “Surishtiruv jurnalistikasi korrupsiyaga qarshi kurashishning samarali omili” yangi qo‘shma loyihasi doirasida amalga oshirilmoqda. Korrupsiyaga qarshi kurashish agentligi loyiha hamkori hisoblanadi.

Treningda respublika hududlaridan tashrif buyurgan jurnalist va blogerlar uchun xalqaro tashkilotlar vakillari, xalqaro ekspertlar hamda  Korrupsiyaga qarshi kurashish agentligi masʼul xodimlari maʼruza bilan ishtirok etishdi.

Dastlab kirish qismida Agentlik vakili tomonidan korrupsiyaga qarshi kurashish siyosatining asosiy yo‘nalishlari, uni amalga oshirishda OAV roli, ular bilan hamkorlikda amalga oshirilayotgan loyihalar haqida batafsil maʼlumot berib o‘tildi.

Shuningdek, tadbirning amaliy mashg‘ulotlar qismida davlat organlari va tashkilotlari tomonidan ochiq eʼlon qilinayotgan maʼlumotlar va ular bilan ishlash bo‘yicha batafsil tushuntirish berildi.

Treningning ikkinchi kuni zamonaviy surishtiruvchi jurnalistga qo‘yiladigan talablar, uning xavfsizligi masalalari, faoliyatida axloq meʼyorlari kabi ixtisoslashgan masalalarga to‘xtalib o‘tildi hamda amaliy mashg‘ulotlar tashkil etildi.

Korrupsiyaga qarshi kurashish agentligi

Axborot xizmati