Joriy yilning 18-19 may kunlari Olma-Ota shahrida "Xalqaro investitsiya loyihalarida korrupsiyaga qarshi kurashish sohasida hamkorlikni oshirish" mavzusida o‘tkazilgan xalqaro seminarda Agentlik vakillari ishtirok etdi.

BMTning Giyohvand moddalar va jinoyatchilik bo‘yicha boshqarmasi (BMT GJB) tomonidan tashkil etilgan mazkur seminarda qator xalqaro ekspertlar hamda Avstriya, Armaniston, Belorus Respublikasi, Bosniya va Gersegovina, Gruziya, Mo‘g‘uliston, Eron, Xitoy, Qirg‘iziston, Turkiya va Chernogoriya davlatlari vakillari ham ishtirok etdi.

Seminarda BMT GJB Mintaqaviy aksilkorrupsiya maslahatchisi tomonidan «Xorijiy investitsiyalarni rag‘batlantirish agentligining faoliyatida aksilkorrupsiya va halollik» mavzusi doirasida taqdimot o‘tkazilib, unda asosan xorijiy investitsiyalarda ushbu tashkilotlarning korrupsiyaga qarshi kurashish idoralari bilan mustahkam hamkorlikka tayanish lozimligiga alohida urg‘u berildi.

Shuningdek, BMT GJB tavsiyalari va boshqa xalqaro aksilkorrupsiya mexanizmlarini (GREKO, Istanbul Harakatlar rejasi) o‘z tajribalariga joriy etib borishi muhimligiga to‘xtalib o‘tildi.

Seminar ishtirokchilari xalqaro investitsiya loyihalarida korrupsiyaga qarshi kurashish bo‘yicha o‘z milliy tajribalari yuzasidan maʼlumot berib o‘tdi.

Korrupsiyaga qarshi kurashish agentligi

Axborot xizmati