Joriy yilning 11-12-iyul kunlari “Korrupsiya va korrupsiya bilan bog‘liq jinoyatlarni yoritishda jurnalistik surishtiruvlarning roli” mavzusida onlayn trening bo‘lib o‘tdi.

Treningda ommaviy axborot vositalari, tashkilotlar axborot xizmati rahbarlari hamda jurnalistika ixtisosligida o‘qiyotgan talabalar ishtirok etishdi.

Trening Korrupsiyaga qarshi kurashish agentligi, “Mintaqaviy muloqot” (Sloveniya) XNT tashkilotining O‘zbekistondagi filiali, “Pioneer” korrupsiyani o‘rganish bo‘yicha tadqiqot instituti (AQSH) bilan hamkorlikda tashkil etildi.

Trening davomida jurnalistik surishtiruvni tashkil etish va o‘tkazish bo‘yicha xorijiy tajribalar, mazkur yo‘nalishining paydo bo‘lish jarayonlari, huquqiy asoslari va muammoli masalalari to‘g‘risida fikr almashishdi.  

Trening xalqaro ekspertlar Djeyms Stergios – Pioner instituti direktori, hamda institut masʼul xodimlari Meri Konnogton, Kris Sinakola kabi sohaning tajribali mutaxasisslari tomonidan olib borildi.

Maʼlumot uchun: “Pioner” korrupsiyani o‘rganish bo‘yicha tadqiqot instituti Massachusets shtatining Boston shahrida joylashgan bo‘lib, asosiy maqsadlaridan biri korrupsiyaga qarshi kurashish va uning oldini olish.

Treningning dastlabki kuni mavzuning nazariy masalalari amaliy misollarga to‘xtalib o‘tilgan bo‘lsa, ikkinchi kuni interaktiv shaklda, o‘zaro fikr almashish, savol-javob shaklida tashkil etildi.

Xususan, jurnalistik surishtiruvda olib borishda qonunchilik talablari va kasb etikasiga amal qilish mezonlari, OAV vakillari uchun mavjud kafolatlar, jurnalistlarning himoyasi, surishtiruv o‘tkazayotganda eʼtibor qaratish kerak bo‘lgan asosiy jihatlar, korrupsiyaga oid jurnalistik materiallarni  tayyorlashda sunʼiy intellekt imkoniyatlaridan qaysi jarayonlarda foydalanilmoqda kabi masalalar yuzasidan o‘zlarini qiziqtirgan savollarga javob olishdi va o‘zaro fikr almashishdi.

Korrupsiyaga qarshi kurashish agentligi

Axborot xizmati