Joriy yilning 3-5-oktabr kunlari Agentlik direktori o‘rinbosari U.Tuxtasheva boshchiligidagi Korrupsiyaga qarshi kurashish agentligi va Bosh prokuratura vakillaridan iborat O‘zbekiston delegatsiyasi Istanbul harakatlar rejasi (IHR) 22-Monitoring yig‘ilishi va Boshqaruv guruhining 28-yig‘ilishida ishtirok etdi.

Iqtisodiy hamkorlik va taraqqiyot tashkilotining (IHTT) Sharqiy Yevropa va Markaziy Osiyo uchun korrupsiyaga qarshi tarmog‘ining yig‘ilishi davomida IHTT 5-raund monitoringi doirasida birinchi bosqichida hisobotlar taqdim etgan davlatlar, jumladan, Armaniston, Ozarbayjon, Ukraina va Moldova mamlakatlarining umumiy bahosi va monitoring natijalari taqdim etildi.

Uchrashuvlar davomida ekspertlar tomonidan tizimni takomillashtirish bo‘yicha tavsiyalar berildi, mamlakatlar ishtirokchilarga tavsiyalarni amalga oshirish bo‘yicha rejalarini va monitoringdan so‘ng 2023-yil davomida ro‘y bergan amaldagi o‘zgarishlarni havola etdilar.

Maʼlumot uchun: Tadbirlarda 20 dan ortiq davlat va xalqaro tashkilotlar vakillari ishtirok etdi. O‘zbekistonda 5-raund monitoringi 2024-yilda o‘tkazilishi rejalashtirilgan.

Boshqaruv guruhi yig‘ilishida 2023-yilga mo‘ljallangan IHT Ishchi dasturi amalga oshirilishi va 2024-yilga mo‘ljallangan ish rejasiga takliflar ko‘rib chiqildi. Shuningdek, Boshqaruv guruhi “Korrupsiyaga qarshi kurash bo‘yicha hududiy prognoz” pilot hisoboti loyihasining asosiy ko‘rsatkichlarini muhokama qildi.

Bundan tashqari, U.Tuxtasheva taʼlim sohasidagi halollik masalalariga bag‘ishlangan navbatdan tashqari sessiyada maʼruza bilan ishtirok etdi, uning doirasida taʼlim sohasida korrupsiyaga qarshi kurash bo‘yicha amalga oshirilayotgan chora-tadbirlar, jumladan, institutsional va elektron yechimlarni taqdim etdi.


Korrupsiyaga qarshi kurashish agentligi

Axborot xizmati