Xabaringiz bor, 2021-yil 1-oktyabrdan boshlab barcha davlat organlari va tashkilotlarida  korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish, manfaatlar toʻqnashuviga yoʻl qoʻymaslik hamda korrupsiyaga nisbatan murosasiz munosabatni shakllantirish choralarini koʻrish uchun masʼul boʻlgan korrupsiyaga qarshi ichki nazorat tuzilmalari  (“komplayens nazorat”) joriy etilmoqda. 

Endilikda rasmiy sahifalarimiz orqali mazkur yangi tuzilmalar faoliyati va natijalariga oid maʼlumotlarni taqdim boramiz. 

Korrupsiyaga qarshi ichki nazorat tuzilmalari (“komplayens-nazorat”) korrupsiya holatlarini barvaqt aniqlash va oldini olish, ularning sabab va shart-sharoitlarini bartaraf etish choralarini koʻrishda qisqa vaqt ichida oʻzining muhim ahamiyati va samarasini namoyon etmoqda. 

Jumladan, Bandlik va mehnat munosabatlari vazirligining "Komplayens-nazorat" boʻlimi tomonidan Korrupsiyaga qarshi kurashish agentligi bilan hamkorlikda yashirin iqtisodiyot va korrupsiyaga qarshi kurashish hamda uning oldini olish boʻyicha 2020-2021-yillarga moʻljallangan “Yoʻl xaritasi” ijrosi boʻyicha ISO 37001 xalqaro standart talablari asosida vazirlik tizimida korrupsiyaga qarshi kurashish bilan bogʻliq 18 ta ichki me’yoriy hujjatlar ishlab chiqildi. 
 
Oʻtgan davr mobaynida "Komplayens-nazorat" boʻlimi tomonidan vazirlik tizimida jami 5 ta oʻrganish oʻtkazilgan.  

Oʻrganishlar natijalari yuzasidan kiritilgan maʼlumotnomalar asosida 2 ta tasarrufiy tashkilotning tashkiliy tuzilmasi toʻliq oʻzgartirilib, manfaatlar toʻqnashuviga olib keluvchi holatlar toʻliq bartaraf etildi hamda xodimlarga nisbatan intizomiy jazo choralari qoʻllanildi, 5 nafar xodim bilan tuzilgan mehnat shartnomasi bekor qilindi.

Bugungi kunda "Komplayens nazorat" boʻlimi tomonidan vazirlik tizimida 3 marotaba xizmat tekshiruvlari oʻtkazilib, xizmat tekshiruvi natijalari boʻyicha tizim tashkilotlariga  tegishli koʻrsatmalar berildi.

Bandlik va mehnat munosabatlari sohasida qonunbuzarlik va korrupsiya holatlari haqida  mehnat.uz sayti orqali “onlayn maslahatchi” yoki 71-200-06-00 raqamli “Ishonch telefoni”ga bevosita xabar berish mumkin.

Korrupsiyaga qarshi kurashish agentligi

Axborot xizmati